hāmani i tā ‘outou fa’anahora’a ‘ohipa

fa’ata’ara’a e te mau fā o te fa’anahora’a ‘ohipa

Te fa’anahora’a ‘ohipa o te hō’ē īa parau o te fa’ata’a maita’i i te ta’ato’ara’a o tā ‘outou ‘ōpuara’a tapiho’ora’a. Te fa’a’ite nei te reira i te pūai o te hō’ē ‘ōpuara’a, o te ti’a e huti mai i te feiā ho’o moni. No reira, e tauturu te fa’anahora’a ‘ohipa ia ‘outou ‘ia haere atu ā i mua i roto i tā ‘outou mau ‘ōpuara’a no te fa’ahotura’a.

fa’anaho i tā ‘outou ‘ōpuara’a

E riro ato’a te fa’anahora’a ‘ohipa ei tū’atira’a i roto i tā ‘outou ‘ohipa taiete. E tauturu te reira ia ‘outou ‘ia ha’amana’o i tā ‘outou mau ‘ōpuara’a matamua e te mau ta’ahira’a ‘āvae e rave. E taui ato’a te reira, tei te huru īa o te manuīara’a o tā ‘outou taiete, te huru tupura’a i te pae fa’anava’ira’a faufa’a, e te mau hoa ‘ohipa tā ‘outou e fārerei. Aita te fa’anahora’a tapiho’ora’a i ha’amauhia i roto i te ‘ōfa’i, terā rā, e arai te reira ia ‘outou ‘ia ha’aparare roa ia ‘outou iho, ‘ia ha’amata ihoa rā ‘outou i tā ‘outou ‘ohipa i reira e mea ‘ōhie roa ‘ia mo'e i roto i te mau mea e ti'a ‘ia fa’anahohia.

Te imira’a i te tu’ura’a moni

Ta’a’ē noatu i te ha’apāpūra’a i te hi’ora’a o te ta’ata taiete no ni'a i tāna ‘ōpuara’a e te ha’amatara’a i te mau mana'o e ti'a ‘ia ha’amaita’ihia, e riro ato’a te reira ei ha’apāpūra’a pūai i roto i te mau fa’aaura’a moni. E mea faufa’a roa ‘ia fa’a’ite i te manuīara’a e te pa’ari o tā ‘outou ‘ōpuara’a i mua i te mau fare moni e te feiā tu’u moni. No reira, e mea ti'a i roto i te fa’anahora’a ‘ohipa ia tu’u i te mau fa’ahope’ara’a o te hō’ē tuatāpapara’a no ni'a i te mātete o te ha’amatara i te mau hina’aro e te mau tītaura’a a te feiā tā ‘outou e hina’aro ra, e nāhea ‘outou i te pāhono ia rātou, e te moni tā ‘outou e mana'o ra e noa’a mai na roto ia rātou.

Nāhea ia hamani i te hō’ē fa’anahora’a tapiho’ora’a ?

E mea ti'a i tā ‘outou fa’anahora’a ohipa ‘ia tu’u i te mau mea faufa’a roa no te fa’anaho maita’i a'e i tā ‘outou ‘ōpuara’a e no te huti mai i te mana'o o te feiā tu’u moni :

• Tā ‘outou ‘ohipa faufa’a matamua, te huru o te mātete ;
• Te (mau) ta’ata tā ‘outou e titau ra, tō rātou mau hina’aro ;
• Te pūpū e te mau hoa ‘ohipa mai te mea ua ‘itehia ‘ā’ena rātou ;
• Te mau tauiha’a e te mau ‘ohipa ;
• Te fa’anahora’a a te taiete no te tau poto, rōpū e no te tau roa ;
• Te mau tuha’a no te ha’amaura’a e te fa’ahotura’a o te taiete ;
• Te mau huru tu’ura’a moni i horo'ahia ;
• Te parau tohu i te pae moni ;
• E nūmera te ‘āpī o te ha’amāu’ara’a.

E mea ti'a ‘ia tuatāpapa i teie mau tumu parau ato’a ma te māramarama e te poto. Eiaha e vaiiho i te hō’ē mea ma te mana'o-ore-hia. E mea ti'a ia tano tā ‘outou mau tohura’a. A haere na mua i te mau uira’a a te feiā fare moni e a te feiā tu’u moni : No te aha teie ‘ōpuara’a, nāhea te reira e ta’a’ē ai, o vai ‘outou e eaha tā ‘outou e hōpoi mai i roto i te ‘ōpuara’a, eaha te mau fifi tā ‘outou e fārerei e nāhea ‘outou i te fa’aruru i te reira, e te vai atu ra.

I te pae hope’a, eiaha e ha’amarirau i te fa’aō i te mau pāpa’ira’a tatarara’a e te mau hōho'a no te fa’a’ōhie i te tai’ora’a e no te ta’a-maita’i-hia, e ‘ia ha’apa’o maita’i i te fa’anahora’a e te pāpa’ira’a o te parau.

4 mana'o tauturu no te papa'i i te hō’ē fa’anahora’a ‘ohipa maita’i

1. A ha’apoto noa
A tu’u i te maita’i na mua a'e i te fāito e a haere ti'a i ni'a i te mana'o. A fa’a’ite noa i te mau ha’amāramaramara’a e titauhia no te ‘ōpuara’a.

2. A ha’apāpū i te faufa’a rahi o tā ‘outou mau tauiha’a e aore rā mau ‘ohipa
Eaha te ta’a’ēra’a i te tata'ura’a, mai te mea ē, te vai ra te tata'ura’a ? Eaha te mau hina’aro a te mau hōani tā rātou e pāhono nei, no te aha tā ‘outou mau hōani e parau mai ai ia ‘outou eiaha rā te tahi atu ?

3. A fa’a’ite i tā ‘outou pūpū ‘ohipa
A fa’a’ite i te mau mero tāta’itahi o te pūpū fa’atere e te mau ti’ara’a faufa’a i roto i te taiete. E tāmarū te reira i te feiā i te fare moni e te feiā tu’u moni ‘ia ‘ite e mea aravihi ānei te mero tāta’itahi aore ra te vai ra to rātou ‘ite e te mau maita’i e titauhia no te fa’atupu i te ‘ōpuara’a.

4. A fa’a’ite i te mana'o pāpū
A fa’a’ite i te tuha’a tāta’itahi ma te ‘ore e ha’afaufa’a ‘ore e aore rā, e ha’afaufa’a rahi roa i te reira. A fa’aātea i te mau fifi ē eiaha e ha’amarirau i te fa’ahiti i te reira : ta’a’ē noatu i te fa’aineinera’a maita’i a'e mai te mea e tupu mai te reira, e fa’a’ite ‘outou i te feiā aufau moni e, e ta’ata aravihi ‘outou e te pa’ari.

Hou a ha’amau ai i te hō’ē tapiho’ora’a, e fa’aitoitohia ‘ia rave i te hō’ē tuatāpapara’a i te mātete. I roto i teie tuatāpapara’a, te hi'opo'ara’a īa ē, te tuea ra ānei te mana'o tapiho’ora’a i te mau tītaura’a ē e ti’a īa te reira e fa’aara i te ‘ana’anatae o te hō’ē ta’ata.

Eaha te tuatāpapara’a i te mātete ?

Te fā o te tuatāpapara’a i te mātete o te hi'opo'ara’a īa i te mātete tā ‘outou e hina’aro e ti'a. Te fa’atumu nei te tuatāpapara’a i ni'a i te :

• Te terera’a faufa’a o te mātete (te huru, te tauira’a, te fa’aturera’a ?)
• Te huru o te mau ta’ata (te mau ravera’a)
• Titaura’a (tāuirara’a o te mau mea)
• Tata'ura’a (te mau tauiha’a e vai ra, te mau moni ho’o)

E horo'a mai te reira i te hō’ē hi’ora’a ta’ato’a e te hu'ahu'a o te mātete ē e fa’ati’a i te ha’apāpūra’a — e aore rā, no te fa’a’ore i te ‘ōpuara’a tapiho’ora’a. Te pāhono nei te reira i te hō’ē uira’a faufa’a roa : Te vai ra ānei te hō’ē pārahira’a no te hō’ē taiete ‘āpī i ni'a i te mātete ē, mai te mea ē, nāhea oia e nehenehe ai e ha’amau i te hō’ē ti’ara’a pāpū e te vai maoro ?

Te mau here pata e ti'a ‘ia ‘ape :

• Te mana'ora’a ē, e mea ta’a’ē to ‘outou mana'o ;
• rave i tā ‘outou tuatāpapara’a i te mātete na roto noa i te tauturu a te ‘itenati ;
• Aita e tāmata ra i tā ‘outou mana'o ;
• Te hina’aro e haere vitiviti roa.

O vai te nehenehe e rave i te mā’imira’a i te mātete ?

E ti’a tā ‘outou e rave i te hō’ē tuatāpapara’a no te mātete o ‘outou ana'e, e nehenehe ato’a tā ‘outou e pi’i i te feiā ‘aravihi (taiete mā’imira’a e aore rā, taiete tauturu, nati tauturu, e te tahi atu ā).

E mea maita’i ‘ia fa’aō mai i roto i te tuatāpapara’a i te mātete, no te fari’i ihoa rā i te ‘ite rahi no ni'a i te tuha’a ‘ohipa, te tata'ura’a, te mau hōani o te riro ei faufa’a no te taiete e o te fa’arahi i to ‘outou manuīara’a.

Te hō’ē ta’ata fa’atere tei ‘ite i te mau huru o te mātete, e ti’a īa oia e fa’atano maita’i a'e i tana mau tauiha’a e tavinira’a.

Te mau uira’a tano no te ui ia ‘outou iho

fa’ata’ara’a i te mātete

Teie te ta’ahira’a matamua, o te fa’ati’a ia ‘outou ‘ia fa’ata’a i te huru o te tuha’a tā ‘outou e ‘ana’anatae ra. Te mātete – Eaha te ta’ata e titau ra, te ‘ā’anora’a i te fenua, te rahira’a, te faufa’a ? Eaha te mau tauira’a ta’a’ē e nehenehe e tupu ?

Te mau tauiha’a e te mau ‘ohipa – Eaha te mau tauiha’a e te mau ‘ohipa tā tō ‘outou mau ta’ata tata'u e pūpū nei ? Eaha tā rātou mau pūai e tā rātou mau paruparu ? E mea ta’a’ē ānei rātou i tā ‘outou ?

A hi'opo'a i te anira’a

Te hi'opo'ara’a i te anira’a, hō’ē ā īa huru e te hi'opo'ara’a i tā ‘outou mau hōani :

• Eaha tā rātou mau huru matamua (te fāito matahiti au noa, te vāhi, te ti’ara’a taiete, te moni ‘ohipa, e te vai atu ra) ?
• Eaha tā rātou mau hina’aro, tā rātou mau peu ‘amu, tō rātou mau mana'o, tō rātou mau mata'u, tā rātou mau tīa’ira’a ? E ho’o mai ānei rātou i ni'a i te ‘itenati e aore rā, i roto i te fare toa ?
• Te ha’amāha ra ānei te tata'ura’a i to rātou mau hina’aro ? E mea tāiva ‘ore ānei te mau hōani i te tahi mau taiete, e mai te peu ē, no te aha ? Eaha te mau mea e ti’a e ha’amaita’i i te mau tauiha’a e te mau ‘ohipa ta rātou e fāna’o ?

A hi'opo'a i te pūpūra’a

• Eaha te mau tauiha’a e te mau ‘ohipa ato’a e pūpūhia nei i roto i teie tuha’a ? Eaha tā rātou moni ? Teihea te mau mea ho’o - rahi - roa - hia, na vai e no te aha ? E mea maita’i ānei te reira ? Nahea teie mau tauiha’a e teie mau ‘ohipa i te tauira’a i roto i na ahuru matahiti i ma'iri a'e nei ?
• O vai tā ‘outou mau ta’ata tata'u, e hia rahira’a ta’ata, eaha tā rātou vāhi ‘ōperera’a, eaha tō rātou mau pūai e to rātou mau paruparu, o vai tā rātou mau hoa ‘ohipa e to rātou mau ta’ata ho’o mai, eaha tā rātou mau fa’ahope’ara’a i te pae moni, eaha tā rātou ‘ōpuara’a ?

A hi'opo'a i te mau mea e ha’a’ati ra

No te fa’a’oti i te tuatāpapara’a, e mea ti'a ia ‘outou i teie nei ‘ia’ ite i te mau mea ato’a no rāpae mai o te nehenehe e ‘ohipa i ni'a i te mātete, e no reira tā ‘outou ‘ohipa, na roto i te hō’ē rave'a maita’i e aore rā, ino :

Te mau fa’aturera’a I roto i te tuha’a fenua i reira ‘outou e ‘ōpua ai e ha’amau, te vai ra ānei te tahi ture ta’a’ē no ta ‘outou tuha’a e aore rā, no tā ‘outou ‘ohipa ? Te vai ra ānei te tahi mau tauira’a e ravehia ra ? O vai te mau fa’anahora’a i roto i te mātete ?

poritita Eaha te mau pāpū ‘ore i teie nei ? Te vai ra ānei te mau fifi ? Eaha te fa’aturera’a no te tute i teie nei ?

I te pae fa’anava’ira’a faufa’a e i te pae tōtiare Eaha te fāito o te ‘erera’a i te ‘ohipa i teie nei ? Eaha te moni e vai ra ?

E fa’ati’a te tuatāpapara’a i te mātete ia ‘outou ‘ia huti mai i te mau fa’aotira’a no ni'a i te manuīara’a o ta ‘outou ‘ōpuara’a tapiho’ora’a e, mai te mea ē mea maita’i teie mau hope’ara’a, e ha’amata īa ‘outou i te papa'i i ta ‘outou ‘ōpuara’a tapiho’ora’a, o te fa’ati'a ia ‘outou ‘ia fa’ata’a maita’i a'e i tā ‘outou ‘ōpuara’a e ‘ia noa’a mai te moni.

No te ho’o i te taime iho a fa’ati’ahia ai te hō’ē taiete e no te fa’atupu i te hō’ē pūpū hōani nava'i e te ha’apa’o maita’i, e mea ti'a i te hō’ē ta’ata tapiho’o ‘ia ‘ite maita’i i te tuha’a tāta’itahi o te ‘ohipa tapiho’ora’a o te ‘ohipa i roto i te tupura’a o tāna taiete. Eaha te aura’a o te reira e nāhea e ti’a ai e fa’anaho i te hō’ē rave'a maita’i ‘ia au i teie mau tuha’a ?

Eaha te fa’anahora’a nō te ano’ira’a tapiho’ora’a ?

Te anoira’a tapiho’ora’a o te mau mauha’a tapiho’ora’a īa tā te hō’ē taiete e fa’a’ohipa no te ho’o atu i tāna mau tauiha’a e aore rā, tāna mau ‘ohipa i tana mau hōani. Te vai ra te mau mea papu maita’i o te fa’ati’a i te taiete ‘ia rave i te mau fa’aotira’a ho’o maita’i i te fāito tāta’itahi. E tauturu teie mau fa’aotira’a i te :

• haru mai i te mau hōani e tāpe’a ia rātou ;
• fa’ananea i te mau pūai e tā’ōti’a i te mau paruparu o te taiete ;
• riro ei ta’ata tata'u rahi a'e ;
• fa’aau maita’i a'e i te mātete e tōna mau tupura’a ;
• Ha’amaita’i i te ohipara’a i roto i te mau tuha’a fa’atere e te mau hoa ‘ohipa e te feiā ho’o tauiha’a.

Mai tōna fāra’a mai i te mau matahiti 60, ua taui rahi te ‘ohipa tapiho’ora’a no te mau rave'a ‘āpī e te mau peu a te feiā ho’o tao'a.

Na 4 P o te ano’ira’a tapiho’ora’a

« Mix Marketing » o te hō’ē īa ta'o peretāne tei hāmanihia i te mau matahiti 60 e te ta’ata marite ra o Jerome McCarthy, ‘orometua ha’api’i no te fa’aterera’a i te ‘ohipa tapiho’ora’a. Ua fa’anahohia te « Marketing Mix » i ni'a e 4 tuha’a, te « 4 P » : Price, Product, Place, Promotion / moni, tauiha’a, vāhi, fa’ahotura’a

PRICE – Te moi : Nahea ‘ia ha’amau i te hō’ē moni ho’o ? ha’amaura’a a te moni ho’o o te hō’ē tao'a i ni'a i te mau tuha’a e rave rahi :

ha’amaura’a a te moni ho’o o te hō’ē tao'a i ni'a i te mau tuha’a e rave rahi :

• E mea ti'a i te ho’o o te tauiha’a, te ho’o o tā ‘outou tauiha’a ‘ia hau a'e i te moni no te hāmanira’a no te fa’atupu i te ‘āpī. E ti'a ato’a i te reira ‘ia tu'ati i ta ‘outou mau ‘ōpuara’a i te pae fa’arava’ira’a faufa’a ;
• Te hoho'a o te tauiha’a, te huru o ta ‘outou e hina’aro ‘ia hi'ohia tā ‘outou tao'a (tao'a maita’i e aore rā, tauiha’a māmā) ;
• Te tata'ura’a, eaha te moni ho’o ta ‘outou mau ta’ata tata'u e ho’o nei i te hō’ē ā tao'a ;
• Te feiā e titau ra, Eaha te mana ho’o o te feiā ta ‘outou e hina’aro e ho’o atu i ta ‘outou tauiha’a.

PRODUCT – Te tao'a : Eaha ta ‘outou e hina’aro ‘ia hi'ohia ta ‘outou tao'a ?

Te fa’aturera’a niuhia i ni'a i tā ‘outou tauiha’a o te mana'o matamua īa tā ‘outou e fari’i no ni'a i tā ‘outou fa’anahora’a tapiho’ora’a. Te fā o te fa’a’ana’anatae īa i te feiā ho’o i tā ‘outou tauiha’a.

E mea ti'a i te hō’ē tao'a ‘ia pāhono i te hō’ē tītaura’a ta’a’ē e no reira te mau fa’aturera’a tā ‘outou i ha’amau na mua a'e ‘ia au i te mau hina’aro o tā ‘outou mau hōani. No reira, e rave rahi mau mana'o tei fa’ata’ahia no te hō’ē tao'a :

• Tōna hōho'a (pū’ohu, huru, ū) ;
• Tāna mau fa’a’ohipara’a ;
• Tōna maita’i ;
• Te ‘ohura’a o tōna orara’a e te tavinira’a i te mau hōani o te ‘ite i te mau fifi e tupu mai ia fa’a’ohipa ana'e te hōani i te reira.

E ti'a i te taiete ‘ia pāhono i te mau anira’a a te mau hōani a muri a'e, na roto i te hō’ē tātarara’a e aore rā, te hō’ē pūpūra’a māuruuru.

VAHI – ‘ōperera’a : Eaha te mau rave’a no te fa’atīani i ta ‘outou tauiha’a ?

Te ‘ōperera’a, o te rave'a īa e fa’a’ohipahia no te ho’o i tā ‘outou tauiha’a. Te mau rēni ‘ōperera’a, o te mau vāhi ato’a īa e ‘itehia ai tā ‘outou tao'a :

• ‘itenati ;
• Te mau fare toa ;

E ti'a ato’a ia ‘outou ‘ia tu’u i te mau tuha’a no te opere e no te fa’anaho i ta ‘outou tauiha’a i te vāhi ho’ora’a, e aore rā, no te afa'i atu i to ‘outou fare. E mea ti'a ia ma'iti i te mau rave'a ‘ōperera’a ia au i te mau peu ho’o a te mau hōani, eiaha noa i te pae fa’anava’ira’a faufa’a. E mea ti'a ato’a ‘ia ha’apa’o i te mau ha’aputura’a.

FA’A’ITE’ITERA’A – Ha’apararera’a mana'o : Nāhea ‘ia fa’a’ite i ta ‘outou tao'a ?

Te vai ra i roto i te fa’aturera’a ha’apararera’a mana'o o te hō’ē tauiha’a te mau rave'a ha’apararera’a mana'o no te fa’ateitei i ta ‘outou tapa'o, ta ‘outou mau tauiha’a e aore rā, ta ‘outou mau ‘ohipa :

• Ha’apararera’a mana'o roro uira
• Te mau hōho'a fa’atianianira’a (i ni'a i te mau faura'o utara’a ei hi’ora’a) ;
• Te mau tāpura tauiha’a ;
• Te mau aura’a i rotopū i te huira’atira (te mau parau fa’aarara’a a te mau ve'a, te mau fa’ahitira’a no ni'a i te taiete i roto i te mau ve'a) ;

Na te ha’apararera’a mana'o e fa’ata’a i te mau poro'i e fa’ataehia ra, o vai te fa’ataehia e nāhea te reira e tae atu ai i te feiā e fa’aro’o ra ia rātou.

‘Ia papa'i ana'e ‘outou i tā ‘outou fa’anahora’a ‘ohipa, e ti'a ia ‘outou ‘ia ha’apāpū i te mau faufa’a moni o ta ‘outou ‘ōpuara’a. E fa’a’ohipahia te tahi o te reira ei mana'o i roto i ta ‘outou mau fa’aaura’a parau e te feiā horo'a moni e te feiā ho’o moni. Teie te tahi mau mana'o faufa’a roa no te fa’anaho i te hō’ē anira’a moni.

Te parau faufa’a ‘āpī i mana'ohia

E ha’apoto te parau faufa’a ‘āpī i te ta’ato’ara’a o te moni ‘āpī ( te moni e tae mai) e te mau ha’amāu’ara’a e tīa’ihia ra (te mau moni i rāpae) a te hō’ē taiete. E ti’a ta ‘outou e tohu i te moni ‘āpī matahiti i roto i te hō’ē pu'e tau, e 3 e tae atu i te 5 matahiti. Ua nūmera hia teie tāpura moni mai te mau tauira’a ta’a’ē mai teie :

• Te nūmera o te mau ‘ohipa moni ‘api ;
• Te mau ha’amāu’ara’a i te pae moni e te terera’a ;
• Te mau tute ;
• Te iti faufa’a.

E mauha’a faufa’a roa te reira no te ha’amaura’a i te hō’ē tapiho’ora’a, e e fa’a’ohipahia ato’a te reira no te fa’atupura’a i te mau taiete tei ha’amauhia ‘ā’ena.

Te ho’ora’a o te ta’ato’ara’a īa o te moni e roa’a mai i te taiete i roto i te ravera’a i te hō’ē ‘ohipa matauhia e te ‘ohipa. E nehenehe te reira e fa’a’itehia na roto i te fāito aita e tute e aore rā e tute, mai te mea ihoa rā tei roto i te ho’ora’a te TVA. E fa’ati’a te reira ia ‘outou ‘ia hi'opo'a i te ea o te taiete, tāna tuha’a i te mātete, e aore rā, tōna tauira’a i roto i te mau matahiti i ma'iri a'e nei (te tupura’a e aore rā, te topara’a). E nūmera hia te reira i roto i te hō’ē tau ta’a’ē, ia au i te mau hina’aro o te taiete : i te mahana, i te hepetoma, i te ‘āva’e, i te toru ‘āva’e aore ra i te matahiti :

Te nūmera o te mau ‘ohipa (CA) = Te rahira’a o te mau tao'a i ho’ohia x Te moni ho’o

Teie te ho’o e aufauhia e te ta’ata ho’o no te ho’o mai i te tao'a e aore rā, i te ‘ohipa hina’arohia, i muri a'e i te mau ha’amāu’ara’a e aore rā, te mau ha’amāu’ara’a hau. E ti’a te reira e ‘ore e tute (HT) e aore rā, te mau tute ato’a (TTC). Na te ta’ata ho’o e ha’amau i te reira ē e’ita e nehenehe e fa’ahepohia e te ta’ata ho’o aore ra te ta’ata hamani i roto i te mau huru tupura’a ato’a : e mea ōpanihia teie peu i te fenua Farāni e i Europa, ta’a’ē noatu i te tahi mau mea varavara.

Moni ho’o aita e tute = Moni ho’o + Moni api
Te ho’o e tae noatu i te mau tute TTC= Te ho’o aita e tute HT + (Te ho’o aita e tute HT x TVA)

Te ho’ora’a mai o te ta’ato’ara’a īa o te mau ha’amāu’ara’a ta te taiete e rave no te rave i te hō’ē ‘ohipa e aore rā no te hamani i te hō’ē tao'a. E mea ‘āfaro teie mau ha’amāu’ara’a (te mau mātēria tumu, te mau hora ta’ata e titauhia, e te tahi atu ā) e te tahi atu mau ha’amāu’ara’a ‘āfaro ‘ore (tārahu i te fare, te mau ha’amāu’ara’a no te ito, te pārurura’a, te fa’atianianira’a, te ‘ōperera’a, te moni ‘ohipa, e te tahi atu ā). Ia au i te ho’o o te hāmanira’a, e nehenehe ai te hō’ē taiete e ha’amau i te moni ho’o o tana tao'a aore ra tā’aira’a, ‘ia au i te fāito o tana e hina’aro ra.

Ha’amāu’ara’a = Rahira’a o te mau ha’amāu’ara’a ‘āfaro e te ‘āfaro ‘ore / Rahira’a i hāmanihia

Moni rahi / Moni tapiho’ora’a

E tu'ati te moni rahi i te ta’a’ēra’a i rotopū i te moni ho’o e te ho’o o te hō’ē tao'a e aore rā, o te hō’ē ‘ohipa. Teie te ‘āpī ta te taiete e noa’a mai na roto i te ho’ora’a tāta’itahi. Te parau nei tatou no te moni tapiho’ora’a no te ho’o fa’ahou i te mau tauiha’a.

moni rahi = Moni ho’o aita e tute HT – Moni ho’o MAI aita e tute HT
Te moni ho’ora’a = CA – Te ta’ato’ara’a o te mau ha’amāu’ara’a

I te tahi a'e pae, e tu'ati te moni ‘āpī i ni'a i te hānere ‘āpī o te taiete. E nūmera hia te reira na roto i te vāhīra’a i te ‘āpī , tei pi’i-ato’a-hia te moni āpī, na roto i te nūmera o te ‘ohipa.

‘ōti’a moni= ‘ōti’a ‘api / (CA x 100)

E tu'ati te fāito topara’a i te fāito o te nūmera o te ‘ohipa e te rahira’a ho’ora’a e ti'a ‘ia ravehia ‘ia ti’a i te taiete ‘ia ha’amata i te āpī. E ti’a e nūmera i te hō’ē fāito no te ‘ohipa tāta’itahi a te taiete, ta’a’ē noatu i te fāito hope’a. No reira, e mea faufa’a roa teie mana'o ē e ti'a ‘ia itehia i roto i te fa’anahora’a ‘ohipa, e ‘ia ha’apāpū-maita’i-hia na mua a'e i te ha’amatara’a o te hō’ē taiete ‘āpī e aore rā, te hō’ē tauiha’a āpī e aore rā, te hō’ē ‘ohipa ‘āpī.

fāito tanotanora’a= Ha’amāu’ara’a tāmau / [(CA – ha’amāu’ara’a tāuiui) / CA)]

E mea faufa’a roa te fa’anahora’a moni no te ha’amaura’a i te hō’ē taiete, no te tupura’a maoro atoa rā. E tuha’a faufa’a roa te reira no te fa’anahora’a ‘ohipa e te horo'a nei i te moni e titauhia no te fa’atupu i te ‘ōpuara’a. Te vauvauhia ra te reira na roto i te mau ana’ira’a :

• Te mau ‘ohipa, oia ho'i, te mau hina’aro moni a te taiete (te ha’amāu’ara’a e te fa’aterera’a)
• Te mau rave'a : te mau rave'a moni no te aufau i te rave ‘ohipa.

Te ta’ato’ara’a o te mau hina’aro = Te ta’ato’ara’a o te mau rave'a. A ha’apa’o maita’i i te taime e titauhia no te fāna’o i te mau tauturu a te hau, ē e ti’a ‘ia feruri i te hō’ē tārahu i te fare moni.

Te ha’apotora’a o te hō’ē īa parau no te reo peretāne o te parau no tā ‘outou ‘ōpuara’a no te ha’amau e aore rā no te ho’o mai i te hō’ē taiete. E riro ato’a te reira ei rave'a no te huti mai i te feiā ho’o moni.

Vauvau i te hō’ē ha’apotora’a ‘ōpuara’a

E ha’apotora’a no te terera’a ‘ohipa, o te ‘ōmuara’a īa o ta ‘outou fa’anahora’a ‘ohipa. E mea ti'a ‘ia māramarama e ‘ia poto e i’a horo'a i te hō’ē ha’apotora’a ‘ana’anatae no ta ‘outou ‘ōpuara’a taiete.

Roa

Eiaha te ha’apotora’a ‘ia hau atu i te 2 ‘api. E ti’a ‘ia vauvau i te ‘ōpuara’a e ‘ia ha’apoto i te mau ha’amāramaramara’a faufa’a i roto i te hō’ē taime iti roa no te tai’o. E nehenehe te hō’ē ha’apotora’a roa a'e e fa’anevaneva i te feiā tu’u moni.

Fa’anahora’a ‘api

E ti’a i te papa’i ia ha’apuroro hia e ia fa’anaho i te hō’ē rave’a ia ‘ōhie roa te tai’ora’a. E mea ti'a i te feiā tai'o – e nehenehe e ta’ata tu’u moni – ‘ia ‘ite ‘oi’oi i te mau ha’amāramaramara’a faufa’a. E ti’a tā ‘outou e rave i te reira na roto i te pāpa’ira’a i te mau parau tumu, te tu’ura’a i te mau pēni no ta ‘outou mau upo’o parau, e te tahi atu ā. Eiaha e mata’u i te tu’u i te mau hoho'a, te mau tāpura e te mau fa’ahoho’ara’a no te fa’a’ōhie i te māramarama

Te ti’ara’a hōho’a ta’ata

Mai te peu ē ua feruri ‘ā’ena ‘outou i to ‘outou ti’ara’a hōho’a ta’ata, e to ‘outou ihoa rā huru hi’ora’a, eiaha e ha’amarirau i te fa’a’ite i te reira i roto i tā ‘outou parau. A tu’u i tā ‘outou tapa'o i te poro o te ‘api, a fa’a’ohipa i te mau pēni o ta ‘outou tapa'o, e te vai atu ra. E fa’a’ite teie mau mea ē, ua ‘ite ‘outou i te faufa’a o te hiro'a hi'o, o te tāmarū i te feiā e nehenehe e tu’u i te moni.

A papa'i i te reira i te taime tano

Noatu ē, e ‘itehia te reira na mua roa i roto i te hō’ē fa’anahora’a ‘ohipa, e mea ti'a ‘ia pāpa’ihia te ha’apotora’a hope’a. O te ha’apotora’a īa o te ta’ato’ara’a o te parau e e tuatāpapa te reira i te mau tuha’a faufa’a roa o tā ‘outou e tuatāpapa i roto i te mau tuha’a i muri nei. No reira, a tīa’i e tae roa atu i te taime ua fa’a’oti ‘outou i te tahi atu mau tuha’a o ta ‘outou fa’anahora’a ‘ohipa hou a tuatāpapa ai i te ha’apotora’a ‘ohipa.

Te mau mea faufa’a ta’a’ē

Te taiete, te mau mea e tupu ra

E mea ti'a ia ‘outou ‘ia ha’amata na roto i te hō’ē fa’a’itera’a ta’ato’a o ta ‘outou ‘ōpuara’a : i roto i tei hea tuha’a ‘ohipa tā ‘outou e hina’aro e ha’amau, te mau tauiha’a aore ra te mau ‘ohipa ta ‘outou e hina’aro ra e ho’o atu e te anira’a ta rātou e pāhono ra, te ti’ara’a o te taiete e no te aha ‘outou i ma'iti ai i teie mā’itira’a ta’a’ē, te rahira’a rave ‘ohipa i mana'ohia.

Te pupu rave ‘ohipa

A fa’a’ite ia ‘outou iho e i te tahi atu mau ti'a mana o te taiete na roto i te hō’ē rave'a tano e te maita’i. E nehenehe ta ‘outou e ha’apoto i to ‘outou huru orara’a tāta’itahi e e fa’a’ite i to ‘outou mau aravihi ta’a’ē e te mau ti’ara’a ta ‘outou e hina’aro e rave ia fa’ati’ahia te taiete. Eiaha e ha’amarirau i te fa’ata’a e nāhea ‘outou i te mana'o e mea au roa na ‘outou e no te aha ta ‘outou pūpū ha’amau e fa’atere ai i teie ‘ōpuara’a tapiho’ora’a.

Te mātete

E mea ti'a ia ha’apāpū i ta ‘outou mau ta’ata ho’o moni ē, ua rave ‘outou i te hō’ē tuatāpapara’a papu no ni'a i te mātete, o tei fa’a’ite mai e, e manuia teie ‘ōpuara’a i roto i te hō’ē tau maoro. E tuatāpapa hu'ahu'a atu ā teie tuatāpapara’a i te mātete i roto i te toe'a o te fa’anahora’a ‘ohipa. Te mea faufa’a roa no te ha’apotora’a o te ha’apāpūra’a īa e, te pāhono ra ta ‘outou pūpūra’a i te hō’ē tītaura’a e vai ra e te vai ra ta ‘outou mau rave'a no te fa’ata’a’ē ia ‘outou i te feiā tata'u.

Te mau tohura’a i te pae moni

I teie nei, e tae atu ‘outou i te tuha’a o te ‘ana’anatae rahi roa a'e i ta ‘outou mau ta’ata ho’o moni, oia ho'i, te mau nūmera. E mea faufa’a roa te fā o teie āhe’e : ‘ia fa’a’ite ē e nehenehe ta ‘outou ‘ōpuara’a e e ho’ona te reira, maoti te mau nūmerara’a feruri maita’i tā ‘outou e fa’ata’a i roto i te tahi atu mau tuha’a o ta ‘outou fa’anahora’a ‘ohipa. A vai noa i te mana'o pāpū, eiaha e ho’o rahi roa i ta ‘outou ‘ōpuara’a e a fa’a’ite e ua ite ‘outou i te mau fifi ta te taiete e nehenehe e fārerei. A fa’anaho ato’a i te mau ‘ōti’a rahi ‘ia nūmera ana'e ‘outou na roto i te mau tauira’a i tohuhia (ei hi’ora’a, e nehenehe e mana'o i te māra’ara’a o te ho’o o te mau mātēria tumu, e te tahi atu ā).

Te fa’anahora’a ta’ato’a

A fa’ata’a i te vāhi tā ‘outou e hina’aro e rave i tā ‘outou ‘ohipa, eaha te maita’i tā ‘outou e ‘ōpua ra e fa’atumu, eaha te tuha’a o te ohipa tapiho’ora’a ta ‘outou e fa’atumu i ta ‘outou mau tauto’ora’a, e te vai atu ra. E mea ‘ōhie roa ‘ia fa’a’ite i te haerera’a i mua i te pae tapiho’ora’a e i te pae aravihi ta ‘outou e mana'o ra, e tae noatu i te mau auhoara’a ta ‘outou e nehenehe e fa’a’oti. A fa’a’ite i to ‘outou mau pūai, eiaha rā e ha’amo’e i te fa’ahiti i to ‘outou mau paruparu. E riro to ‘outou mana'o pāpū e to ‘outou pāpūra’a ei 2 tuha’a papu no te feiā tu’u faufa’a.

Te titaura’a i te feiā tu’u moni

Fa’ahou ā, na roto i te hō’ē rave'a māramarama e te poto, e mea ti'a ia ‘outou ‘ia fa’ata’a i te tauturu moni tā ‘outou e hina’aro no te fa’atupu i tā ‘outou ‘ōpuara’a taiete, no te aha ‘outou e pi’i ai i te feiā tu’u faufa’a, e tae noatu i te mau rave'a tā ‘outou i mana'o ‘ia fa’aru’e ‘ia au i te ‘āpī o tā ‘outou taiete.

Eiaha e ha’amo’e i te tahi noa a'e mea ri’i

Te ha’apotora’a o te tuha’a matamua īa o tā ‘outou ‘ōpuara’a ta te hō’ē ta’ata tu’u moni e fārerei. Mai te mea ē, aita te reira i papa’i-maita’i-hia, mai te mea ē, e horo'a mai te reira i te mau ha’amāramaramara’a hape e aore rā, mai te mea ē, e mea roa roa e e’ita e nehenehe e fāri’ihia, e nehenehe ‘outou e ’ere i te rave'a no te fari’i i te tauturu moni na roto i teie ta’ata tu’u moni. A hi'opo'a i tā ‘outou ha’apotora’a ‘ohipa e te mau ta’ata e rave rahi no te mau huru orara’a ta’a’ē : e mea ti'a ia māramarama i te reira no te feiā aita e rave ra i te ‘ohipa i roto i te tuha’a o ta ‘outou taiete a muri a'e.

Te mau hape rahi e ti'a ‘ia ‘ape :

• Te mau ha’amāu’ara’a moni rahi roa ;
• Tuatāpapara’a i te mātete tau'a-‘ore-hia ;
• Fa’anahora’a ‘ohipa tei ‘ore i hi'opo'ahia ;
• Te moni faufa’a aita i nūmera maita’i hia ;
• Te tau’a-ore-ra’a i tā ‘outou fa’a’itera’a.